Agjencia Europiane e Barnave EMA ka nisur një rishikim urgjent të barit që jepet në rastet e sklerozës së shumëfishtë, Zinbryta (daclizumab) pas 7 rasteve me çrregullime inflamatore të trurit në Gjermani, përfshirë një encefalit dhe një meningoencefaliti, si edhe një rasti në Spanjë.

Paralelisht me fillimin e rishikimit, kompania që tregton Zinbryta-n (Biogen Idec) ka informuar EMA-n se ka për qëllim të bëjë tërheqjen vullnetare të produktit nga tregu.

Zinbryta është autorizuar për trajtimin e formave të përsëritura të sklerozës së shumëfishtë.

Pas një shqyrtimi të vitit 2017 mbi efektet e ilaçit në mëlçi, përdorimi i tij ka qenë i kufizuar te pacientët të cilët kanë provuar të paktën dy trajtime të tjera që modifikojnë sëmundjen dhe kur ata nuk mund të trajtohen me terapi të tjera.

Deri më tani, rreth 8,000 pacientë po trajtohen me Zinbryta në mbarë botën.

Shumica e pacientëve europianë janë në Gjermani.

Mjekët europianë, paralajmëron EMA, do të kontaktohen në ditët e ardhshme për informacione të mëtejshme.

Rezultate imazhesh për Zinbryta

Deri atëherë, ata këshillohen që të mos fillojnë trajtime të reja me Zinbryta dhe të shqyrtojnë pacientët që aktualisht trajtohen me ilaçin, për të filluar një terapi alternative sa më shpejt të jetë e mundur, shkruan farmacist33.

“Pacientët nuk duhet ta ndalin trajtimin pa diskutuar me mjekun e tyre”, specifikon agjencia.

Biogen-i gjithashtu njoftoi EMA-n për vendimin për të ndaluar studimet klinike për Zinbryta-n në BE.

“Pacientët e përfshirë në këto studime mund të kontaktojnë mjekun e tyre për çdo pyetje”, përfundon organi rregullator.